Ito ay kaugnay ng sinasabing 40 mamahaling sasakyan ng mag-asawang Sara at Pacifico II Discaya na may-ari ng mga construction companies na dawit sa multi-bilyong flood control projects na sinisiyasat ngayon ng pamahalaan.
Makaraan ang kautusan ng korte na magsagawa ng search operation sa headquarters ng St. Gerrard Construction General Contractor and Development Corporation sa Pasig City, nagtungo ang mga tauhan ng BOC at sinecure ang 12 mamahaling sasakyan.
Una rito, dalawa lamang ang natagpuan sa 12 luxury vehicles na nasa ilalim ng search warrant na inisyu ng Regional Trial Court of Manila, Branch 18. Ito ay isang Toyota LC300 3.3 V6 ZX AT SUV 2024 at isang Maserati Levante Modena 2022.
Noong una ay hindi makita ang 10 sasakyan dahilan para warningan ni Commissioner Ariel Nepomuceno ang mga Discaya na titiyakin ng BOC na gagawin ang lahat upang matukoy kung nasaan ang mga sasakyan.
"Any discrepancies uncovered will lead to the full collection of duties and taxes, and that those hiding or abetting the concealment of these cars will be punished to the fullest extent of the law," ayon kay Nepomuceno.
Kinagabihan, kinumpirma ng BOC na isinuko na ang 7 pang sasakyan at naka-secure ngayon sa St. Gerrard Construction General Contractor and Development Corporation compound sa Pasig City.
Kabilang dito ang:
* Rolls Royce Cullinan 2023
* Bentley Bentayga
* Mercedes Benz G-Class (Brabus G-Wagon)
* Mercedes AMG G 63 SUV 2022
* Toyota Tundra 2022
* Toyota Sequoia
* Cadillac Escalade ESV 2021
Ayon sa BOC, ang tatlo pang sasakyan na:
* Mercedes Benz G 500 SUV 2019
* GMC Yukon Denali SUV 2022 (Gas)
* Lincoln Navigator L 2024 ay kasalukuyang nasa mga service centers at pinapagawa, at isusuko rin sa BOC.
Ang lahat ng mga sasakyan ay pormal nang sinelyuhan ng BOC at binabantayan ng kanilang mga tauhan at ng Philippine Coast Guard.
Bineberipika na ng BOC kuny ang 12 sasakyan na ito ay may tamang pamamaraan ng importasyon at sumunod sa batas ng customs.
Kung sakaling may nalabag, papatawan ang mga Discaya ng kaparusahan sa ilalim ng Customs Modernization and Tariff Act (CMTA).
(Mga larawan ng Bureau of Customs)
