Sinabi ni Acting Metro Manila Development Authority (MMDA) Chairman Romando Artes na ibabalik sa alas siyete ng umaga hanggang alas siyete ng gabi ang number coding subalit wala pang depinitong araw kung kailan ito sisimulan.
Ayon kay Artes, oobserbahan muna nila simula Nobyembre 6 kung maaapektuhan ng Kapaskuhan ang mga daan sa Metro Manila.
Sa ilalim ng number coding, ipinagbabawal ang paglabas ng mga sasakyan sa pangunahing daan sa Metro Manila ang mga nagtatapos ang plate numbers sa:1 at 2 tuwing Lunes; 3 at 4 tuwing Martes; 5 at 6 tuwing Miyerkules; 7 at 8 tuwing Huwebes at, 9 at 0 tuwing Biyernes.
Kabilang sa nasasakupan ng number coding ang circumferential roads na C1 o Recto Avenue, C2 o Quirino Avenue, C3 o Araneta Avenue, C4 o EDSA, at C5 o CP Garcia.
Ipinatutupad din ito sa radial roads tulad ng Roxas Boulevard o R-1, Taft Avenue o R-2, SLEX o R-3, Shaw Boulevard o R-4, Ortigas Avenue o R-5, Magsaysay Boulevard at Aurora Boulevard o R-6, Quezon Avenue at Commonwealth Avenue o R-7, A. Bonifacio Avenue o R-8, Rizal Avenue o R-9 at Road 10 o Mel Lopez Boulevard.
Sakop din nito ang Alabang-Zapote Road sa Las Piñas at Muntinlupa City, Samson Road at A. Mabini Street sa Caloocan City, Marcos Highway at MacArthur Highway.
Hindi naman kasama sa number coding scheme ang mga public utility vehicles at transport network vehicle service (TNVS), motorcycles, garbage trucks, fuel trucks, registered at marked government vehicles, fire trucks, ambulances, marked media vehicles, ang mga nagdadala ng importante at mabubulok na mga bagay o pagkain at ang mga electric at hybrid vehicles.
