Ayon sa ulat ng Taguig City Police, nakipagtransaksyon sa kanilang ahente ang isang 17-taong gulang na batang lalaki kung saan binalak nitong magbenta ng hinihinalang shabu.
Ang 15 gramo ng hinihinalang bawal na gamot na nagkakahalaga ng ₱102,000 ang nakuha ng mga otoridad sa Child in Conflict with the Law (CICL) sa buy-bust operation noong Hulyo 15, 2026 ng alas 6:00 PM sa Cardones Street, Barangay Central Signal, Taguig City.
Ang operasyon ay isinagawa ng Taguig City Police sa pakikipag-koordinasyon sa Philippine Drug Enforcement Agency (PDEA).
Nakuha sa menor de edad ang tatlong heat-sealed transparent plastic sachets na sinasabing may 15 gramo ng hinihinalang shabu.
Ang menor de edad ay binasahan ng impormasyon ng mga pulis kaugnay ng dahilan kung bakit nila sinasagip ito, sa harap ng magulang nito.
Ang menor de edad ay ibinigay sa pangangalaga ng mga otoridad sa social welfare.
